[retour à un affichage normal]

Accueil > recherche > Affichage d'une occurrence en contexte

Mazarinade n° C_10_42

Image de la page

Anonyme [1649], LA VERITE PARLANT A LA REYNE. , françaisRéférence RIM : M0_3996. Cote locale : C_10_42.


des Dieux, & celuy qui a toute-sorte do pouuoir
sur nous, m’ait enuoyée icy pour vous
descouurir la chose la plus importãte à vous &
à vostre Estat. Puis donc, Madame, que vous
moconnoissez à cette heure, ne faites plus de
difficulté, s’il vous plaist, de prester l’oreille à
ma voix, car i’estime qu’il ne sera pas indecent
qu’vne grande Reine comme vous m’escoute
parler, puisque vous faites si bien profession
de la pieté, que ie ne connois point de Princesse
au monde qui s’en acquitte si dignement
que vous faites. Enfin, Madame, ie suis icy
pour deffendre vn peuple dont les actions,
sans doute vous ont esté quelque peu suspectes,
mais cõme ie suis obligée de me maintenir
dans les hommes, alors que ie m’y rencontre,
(car ils sont les vrayes images de Dieu,
qui se mirant quelque fois en eux, les fait en
quelque sorte participans de sa Verité) ie veux
entreprendre leur cause, sans vous importuner
toutefois, & vous tirer si ie puis de la mauuaise
opinion où vous pouuez estre, suiuant
que les affaires me l’ont assez tesmoigné. Et
d’autãt que c’est vne chose extremement chatoüilleuse
de parler aux Princes, & de leur
vouloir persuader vne chose dont ils se sont