[retour à un affichage normal]

Mazarinade n° A_3_9

Image de la page

Anonyme [1649], LE BON MINISTRE D’ESTAT. , français, latinRéférence RIM : M0_590. Cote locale : A_3_9.

estre affectionne au bien de l’estat, car il ne suffit
pas auoir bonne intention si elle ne tend pas au
bien public, vn homme vertueux, ne laisse pas
d’auoir quelques affections particulieres qui le
porteront quelques fois à faire des choses preiudiciables
à l’estat, par exemple il aymera la guerre
& cette affection le portera insensiblement a
l’entretenir : outre, qu’il la croit iuste & legitime,
neantmoins cette guerre ruine l’estat, elle l’epuise
de Finances, le destitue de grands Capitaines,
qui seruiroient bien à le deffendre quand il seroit
attaqué, il la doit éuiter s’il est affectionné à
l’estat.
 
La troisiesme qualité & la plus rare c’est qu’il
soit desinteressé, qu’il ne face rien directement
n’y indirectement contre l’estat ; pour en tirer vtilité
particuliere. Ce qui se trouue tres peu car
cõme il est difficille d’estre éleué & n’auoir point
d’ambition, d’estre parmy les richesses & les mépriser,
en vn mot de trauailler pour le public, &
ne rien faire pour soy, il arriue ordinairement
que les Ministres ont pour but l’ambition ou les
richesses, & le plus souuent tous les deux : & comme
ces deux passions sont les plus difficilles à assouuir
ils ne sont iamais contens plus ils possedent
& plus ils veulent posseder, & pour ne pas
attirer sur soy la honte de prendre à toute main,
& la hayne des peuples en conuertissant les Finances
à leur proffit, ils se seruent de pretextes specieux,