[retour à un affichage normal]

Mazarinade n° B_19_43

Image de la page

Anonyme [1652], LE DERNIER COMBAT DONNÉ DEVANT ESTAMPES A LA PRISE ET REPRISE TROIS FOIS D’VNE DEMI-LVNE. Et la sortie generale que le Comte de Tauanes fit faire sur les ennemis, où ils sont perdu plus de huict cens hommes. Auec les noms des morts blessez & prisonniers. La nuict du 2. au 3. Iuin 1652. Et les autres particularitez du Courier d’aujourd’huy. , françaisRéférence RIM : M0_1013. Cote locale : B_19_43.

bien autant de valets, lesquels joints aux trouppes
que Monsieur le Prince a leuez icy, feront
vne armée considerable ; & quand mesme il arriueroit
par le plus grand malheur du monde, que
les Mazarins emportassent Estampes par composition :
car ils seroient trop heureux de l’emporter
de la sorte, tousiours les troupes qui en sortiroient
jointes auec celles-cy, feroient vne armée plus
forte de beaucoup que la leur, & par ainsi se rendroient
Maistres de la campagne, qui est le
moyen infaillible pour chasser le Cardinal Mazarin.
Car il auroit peine à trouuer des Villes qui
le voulussent retirer, puis qu’ils s’exposeroient à
vn siege qui seroit veritablement la ruïne entiere
de leurs habitans.
 
Le Courrier qui est venu ce iourd’huy a apporté
la confirmation de ce que dessus ; mais il y a ajousté
vn plus grand nombre de morts, asseurant que
les ennemis ont perdu cinq cens hommes à la premiere
attaque de la demi-lune, & huict cens aux
deux autres : car elle a esté prise trois fois, & reprise
autant. Il adjouste de plus la mort du Comte
de la Londe, qui commandoit les gens-d’armes
de S. A. auec la perte de trois cens des nostres.
Le differend, pour le commandement de l’armée
de S. A. R. a esté terminé, & a esté resoluë
que son A. de Lorraine restera icy prés de S. A. R.
& que M. le Prince commandera les armées.

FIN.