[retour à un affichage normal]

Mazarinade n° A_3_70

Image de la page

Anonyme [1649], LE GEANT SICILIEN TERRASSÉ PAR LES BONS FRANCOIS. , françaisRéférence RIM : M0_1473. Cote locale : A_3_70.

du Poëte. Son naturelle tesmoigne assez, car si les Lyons
& les Loups sont tousiours cruels, il est à croire qu’il porte
les marques de son extraction par l’auarice qu’il porte en
son cœur, car il ne luy suffit pas d’auoir espuisé la France de
tous ses thresors, d’auoir ruiné les villes & la campagne de
tout ce qu’elles possedoiẽt, de n’auoir pas espargné le Roy,
> les Princes, le Parlement, ny les peuples, il se veut encore
saouler autrement, & voyant qu’il ne peut plus tirer les finances
comme auparauant, il veut faire, s’il luy est possible,
qu’il ne nous reste plus rien du tout, se tenant extremement
satisfait de nostre ruine. De plus il ose attenter sur la
vie de tous les François, il tient le Roy dans ses mains, la
Reine, ny les premiers du Royaume ne peuuent eschaper
de ses enchantemens familiers, tout est renuersé dans ce
grand Estat, bref le sang a desia coullé de plusieurs costez &
le succez des affaires ne nous fõt attẽder qu’vn plus grãd desastre.
Ah ! pauure France, que tu fus malheureuse, en receuant
de dans tes entrailles ce serpent qui te cherchoit pour te
deuorer, ne te souuenoit il plus de ce funeste accident qui
t’arriua il y a desia tant d’années dãs le pays de ce miserable,
qui n’a iamais estéque tragique à tous tes enfãs. On sçait que
l’ãbitiõ a tousiours regné dans cette Prouince, tesmoin vne
nourrice impudente, laquelle ayant acquis les bonnes graces
d’vne Reine simple & trop facile, perdit tout le pays
auparauant que d’estre perduë elle-mesme. Il semble que
cette montagne qui vomit incessamment des feux & des
flames, ait esté mise en cet endroit par les mains de Dieu,
pour nous aduertir qu’il en deuoit sortir vn Geant, engeance
de celuy qu’elle oppresse par la iuste vangeance du Ciel,
pour nous venir vn iour oppresser, & qu’encore que nous
en soyons esloignez, elle ne laisse pas neantmoins de nous