[retour à un affichage normal]

Mazarinade n° B_4_4

Image de la page

Anonyme [1652], LE HARAVT FRANCOIS SVR LA TIRANNIE, FAISANT VOIR QVE NOVS mourrons plustost que de consentir à son restablissement si nous considerons, I. Que la Reine ne peut se restablir sans nous destruire. II. Que son retour doit estre accompaigné de celuy de la mal toute. III. Que la presence de la Reine & de son Mignon, est incompatible auec celle des Princes, sans méfiance. IV. Que la Reine & son fauory ne peuuent se restablir sans nostre decry. V. Que la presence de la Reine & de son Mignon, sera l’eternel pretexte de ceux qui voudront broüiller. VI. Et que la France est perduë, si la France ne perd la Reine, & son fauory. , françaisRéférence RIM : M0_1617. Cote locale : B_4_4.

à ceux qui voudront prendre la peine de cõsiderer,
que les Fauoris quelques esleuez qu’ils
soient par dessus les testes des autres, sont neãtmoins
sujets aux secretes entreprises de ceux,
qu’vne presomption de ie ne sçay quoy de plus
esclatant qu’ils reconnoissent en leurs personnes,
fait regarder auec ialousie : Et cette enuie
se porte dautant plus resolument à brasser des
monopoles, contre celuy qu’elle ne peut point
regarder sur vn degré plus éminent que le sien,
sans dépit ; que moins elle a de suiet d’apprehender
ses poursuites, lors mesme que ses mines
seront éuantées ou par l’imprudence de sa
conduite particuliere ; ou par les veilles de ceux
qui sont commis à la garde de sa personne : Ainsi
ie pense qu’il appert assez clairement que la
vengeance n’est seulement point permise, mais
encor enseignee, & pour l’ordinaire eniointe
par la politique des Estats ; & que les Ministres
qui sont esleuez aupres de leur gouuernail par
la faueur de leurs Souuerains, sont obligez, de
ne laisser rien dans l’impunité, de peur qu’en
donnant vn idée fort probable ou de leur lascheté
ou de leur foiblesse, ils ne releuent le
courage de ceux, qui se preuaudront de cette
connoissance, pour brasser incessamment de
nouueaux desseins.