[retour à un affichage normal]

Mazarinade n° C_3_105

Image de la page

Anonyme [1649], LE LYS FLEVRISSANT CVLTIVÉ PAR LA PAIX. , français, latinRéférence RIM : M0_2337. Cote locale : C_3_105.

& qui ont donné de la peur à leurs Aigles. Ie
pourrois dire auec le Prince des Orateurs, que par vn
secret de la Prouidence l’Italie auoit esté entourée de
hautes montagnes, comme d’autant de remparts
pour en deffendre l’entrée aux François, & il adiouste
que ce peuple n’eust pû souffrir que Rome eust esté la
maistresse de l’Vniuers. Comme il est vray de dire que
les Grecs emportoient le prix de l’eloquence, & de
tous les beaux arts sur l’Italie, il n’est pas moins vray
de dire que les Gaulois auoient l’auantage sur eux au
faict de la guerre. Toutefois comme c’est vn eloge
qui leur est donné par les anciens Annalistes, ie ne
m’arresteray pas plus long-temps en cette matiere,
en laquelle ie pourrois estre suspect. Il faut que tout
le monde confesse auec que moy, que la France qui
pourroit par vne estroite vnion de ses forces subiuguer
toute la terre, & renuerser les mosquées, se laisse
vaincre au dedans par des tumultes, & des reuoltes.
Mais éloignons à present les images lugubres de nos
maux passez ; chassons ce qui pourroit troubler nos
festes ; que le son des trompettes soit vn signe de joye,
& non de combat, en vn mot ne parlons plus que de
toy ô chere Paix, si long-temps, & si feruemment demandée
& maintenant obtenuë. Enfin la colere de
de Dieu est flechie, nos prieres ont detourné ses foudres,
& le cours des torrens qui sembloient deuoir
faire vn deluge vniuersel par toute la France. C’est
ainsi qu’on vid autrefois l’Arne sortir de sa couche
pour noyer vne grande partie de la superbe ville de