[retour à un affichage normal]

Accueil > recherche > Affichage d'une occurrence en contexte

Mazarinade n° C_12_28

Image de la page

Anonyme [1652], LE MANIFESTE DE LA REYNE, SVR LE RETOVR DV CARDINAL MAZARIN ET LES AFFAIRES du temps. , françaisRéférence RIM : M0_2359. Cote locale : C_12_28.


d’vn tel progrez, que la victoire les a suiuies par
tout, les bords de la Charente, tant par la leuee
du siege de Congnac, que les diuers combats
remportez sur le party contraire, rendans vn
tesmoignage asseuré de la Iustice des armes du
Roy, nous auons iugé qu’il estoit temps de faire
valoir ces aduantages, en faisant rappeller
par le Roy ledit Cardinal Mazarin, ce qu’ayant
esté fait, il seroit, suiuant les ordres à luy donnez,
entré dans ce Royaume, où il est maintenant,
accompagné des troupes qu’il a leuees
soubs le nom du Roy, pour faciliter son retour,
qui est le seul but de nos pensees, & la fin de
nos trauaux.
 
Iusques icy nous auons fait voir les diuerses
atteintes qui ont estés donnees à l’autorité Royalle
durant nostre Regence, & les moyens dont
nous nous sommes seruie pour passer iusques à la
Majorité, reste de monstrer que c’est auec raison
que nous entreprenons aujourd’huy de reparer
le tort que l’on nous à fait.
Et pour y paruenir, il suffira de considerer en
premier lieu, que quand l’on s’est opposé à nos
volontez, on à tousiours pris le pretexte dudit
Cardinal Mazarin. Consequamment nous
sommes d’autant plus obligez de le faire retourner,
que malgré nous on la fait esloigner, autrement
seroit vne marque esuidente de foiblesse