[retour à un affichage normal]

Mazarinade n° B_5_50

Image de la page

Anonyme [1652], LE MANIFESTE DE MONSEIGNEVR LE DVC D’ORLEANS, AVEC LES CONSPIRATIONS DV Cardinal Mazarin, découuertes par son Altesse Royale, enuoyées aux bons François. ET LA PRISE DE QVATRE cent Casaques. , françaisRéférence RIM : M0_2366. Cote locale : B_5_50.

de point en point ce qui se trouue porté dans
ladite Declaration contre ce Ministre. Ayant donc
esté declaré Ennemy de l’Estat, Perturbateur du repos
Public, conuaincu d’auoir transporté les deniers
du Roy hors du Royaume, auoir empesché la Paix
generale, & donné de mauuaises impressions à l’esprit
du Roy, ie me suis opposé au retour, & au restablissement
de ce mauuais Ministre ; & maintenãt
qu’il est rappellé par le mauuais Conseil de ceux de
sa faction, ie me seruiray de tous les moyens iustes
& legitimes pour l’empescher : Et certes, comme il
n’est point de sujet plus legitime à prendre les armes
que pour deffendre l’Authorité du Roy contre
l’vsurpation & l’iniustice, aussi les Loix de la cõscience
& de la generosité, nous obligent de retirer l’authorité
Souueraine d’entre les mains de ceux qui
l’ont vsurpée, & qui ne s’en seruent que pour la deshonorer
& la destruire. Qui doute que ces maximes
ne soient du tout contraires à l’Estat & à la dignité
Royale, à scauoir, que le Souuerain n’est pas
obligé de tenir sa parole. Dieu a rendu les Roys
venerables, non seulement par le Caractere de son
pouuoir, mais aussi par celuy de sa Verité & de sa
Iustice. Si ceux qui s’en veulent seruir pensent ou
s’excuser ou pretendent de faire auoüer leur cõduite,
alleguant quelque passage de la Politique de
Machiauel qui sẽble fauoriser leur procedure, qu’ils
sçachent que ny eux ny leur grand Precepteur n’auront
jamais asses d’eloquence ou de credit pour
faire approuuer ces maximes qui sont contraires à