[retour à un affichage normal]

Accueil > recherche > Affichage d'une occurrence en contexte

Mazarinade n° A_6_4

Image de la page

Anonyme [1649], LE MOT A L’OREILLE OV LE MIROIR QVI NE FLATE POINT. , françaisRéférence RIM : M0_2498. Cote locale : A_6_4.


pour arriuer à la fin que nous nous sommes proposée : &
par consequent, il faut qu’elle consiste en vne vigoureuse force
d’esprit, & en vne experience consommée au maniement des affaires
publiques, dont la connoissance est tres-difficile. Cette science
Royale a la finesse, la fourbe, & l’imprudence pour ennemies ;
& quelques eloges que la secte Mazariniste puisse donner aux supercheries,
si est-ce pourtant qu’elles ne sçauroient estre receuës,
ny admises, en l’ordre de la prudende. Ce ne sont que des seruantes
de Penelope, capables de preoccuper des insensez, & de rebuter
les sages. Les raisons d’Estat ne visent pas tant à faire des desseins,
& des entreprises, qu’à balancer les moyens plus propres,
& plus à les faire reüssir heureusement comme on souhaitte ; &
pour cela, il faut auoir vne connoissance parfaite des hommes,
des affaires, des pays, & estre adroit & sçauant à toute sorte d’occurrences :
il faut estimer ses ennemis capables de tout entreprendre :
il ne faut pas presumer trop de soy, ny se destourner iamais
du bon chemin, pour quelque consideration que ce puisse estre :
il faut n’auoir rien qui ressente, ny le flateur, ny l’esclaue : il faut
sacrifier ses interests particulier pour ceux du public, & ne resoudre
iamais quoy que ce puisse estre, ny par vindication, ny par colere ;
& comme il est impossible de trouuer vne Republique telle
que Platon l’a desirée, ny vn Orateur à la mode de Ciceron, ny
pareillement vn Capitaine, selon que Xenophon le demande ; ie
tiens aussi qu’il est impossible de trouuer vn parfait Ministre d’Estat,
tel qu’ils nous le faut pour bien conduire nos affaires : Neantmoins,
ie ne croy pas qu’il faille prendre la peine d’en chercher
ailleurs, si la France se trouue sterile en la production des hommes
de cette science Iules Mazarin nous monstre assez par ses actions,
combien les Estrangers sont nuisibles au gouuernement de cette
Monarchie. Ce diable humanise, & reuestu de pourpre (quoy
que d’vne extraction tres-vile, comme tout l’Vniuers sçait fort
bien) apres s’estre mis en quelque consideration dans le monde,
par des voyes aussi criminelles qu’abominables, ne nous apprend
que trop cette verité ; & nous voyons qu’elle ne trouue que trop
de tesmoins dans le temps où nous sommes A vray dire, qu’a-t’il
fait pour nous depuis la mort perpetuellement deplorable de nostre
inuincible Louys le Iuste, dans le maniement de nos affaires,
qu’inuenter tous les iours des nouueaux imposts pour ses interests
propres ? Et quoy qu’vne Reine Regente, & pieuse comme la nostre,
soit en estat de disposer souuerainement de ses graces ; si est-ce
pourtant qu’elle ne laisse pas d’estre obligée de regler ses extraordinaires
liberalitez, pour laisser vne parfaite edification dans