Premier Fondement.

Lors que le Cardinal donna commencement
à son Ministere, se trouuant Vice-Roy & Capitaine
General de Catalogne, le Seigneur Mareschal
de la Mothe, & Intendant General, le sieur Bercher,
voyant qu’il ne pouuoit asseurer sur eux la
direction de son dessein, resolut les tirer tous deux
hors de la Principauté, pour le regard de la Bercher,
il prit pour pretexte le rencontre qu’il eust
auec le sieur Mareschal de la Mothe, estant certain
que ce motif ne le pouuoit obliger, puis qu’il
auoit pris resolution d’en tirer aussi led. Mareschal,
de sorte que son intẽtion fut, d’enuoyer en sa place
le sieur de Marca, afin qu’estant comme il est creature
du Chancelier de France, il eust en Catalogne
vn executeur sans replique de tous ces ordres,
puis qu’il est constant, que le Chancelier n’en a eu
aucune en tous ceux que luy a donné le Cardinal.

Pour le regard du Mareschal, l’on sçait desia
les pretextes qu’il prit pour le tirer hors de Catalogne,
& ce qui est de plus grande consideration
c’est que pour couurir d’auantage son intention,

-- 7 --

& iustifier vne action si iniuste, il enuoya vn Commissaire
François en Catalogne, pour receuoir les
informations contre ledit Mareschal, auec des ordres
fort pressans, & determinatifs pour les tesmoins
François, qui auoient à déposer contre ledit
Mareschal & autres Seigneurs ses dépendans,
sçachant que ces tesmoins estoient ses ennemis capitaux ;
pour confondre dauantage & semer la zizanie
entre les Catalans ; le sieur de Marca en execution
des ordres qu’il auoit, tascha que quelques
Catalans assistassent à la verification des points
desdites informations (comme ils firent) sans autre
intention que de faire le seruice du Roy en vne
matiere que le premier Ministre d’Estat de la France,
& ledit sieur de Marca, publioient en Catalogne,
que ce verifié estoit d’vne tres-grande consideration
pour le bien de l’Estat : mais l’intention
que le Cardinal & le sieur de Marca eurent en cette
affaire pour y interresser les Catalans, fut de
donner commencement à vne diuision & partialité
entre ceux-cy & quelques Catalans, intimes
amis dudit Mareschal, engageant les vns auec le
pretexte du seruice du Roy & protegeant les autres
pour rendre ou faire la diuision plus forte, c’est aussi
mesme vne consideration notable, que pour le
retour de Catalogne du Commissaire François,
auec les informations non si parfaites ny accomplis
comme le desiroit le Cardinal, il resta disgratié
de la Cour.

 

-- 8 --