dessein, mesmes contre l’intention de la Reyne
Regente : & ce pour deux considerations, notamment.

La premiere, qu’ils representent tous les Estats
du Royaume, comme tenant la place de cét ancien
Parlement, sous nos anciens Roys, qui n’estoit
autre chose que l’assemblée des Ducs & Pairs,
qui sont les premiers de l’Eglise, de la Noblesse,
& des principaux Officiers de Iustice, & par consequent
les plus considerables testes de tout le
Peuple ; aussi est-ce en cette qualité que les Edicts
de nos Roys leur sont attribuez, & que la faculté
leur est donnée, de les approuuer & verifier, ou
de les limiter & modifier, mesmes de les refuser
tout à fait s’ils le iugent expedient, la domination
de nos Roys estant si raisonnable, qu’ils ne veulent
pas que leurs Edicts puissent lier & obliger
leurs peuples, que premierement ils n’ayent esté
acceptez par luy, comme iustes & expediens au
bien public.

Et l’autre consideration est, qu’en cette occasion
la Reyne Regente excede tout euidemment
son pouuoir, car n’estant qu’administratrisse de
l’Estat d’autruy, à sçauoir du Roy son Seigneur
& Fils ; Elle n’a point de puissance de le deteriorer,
ny d’en changer les ordres & les maximes,
comme elle a fait par vne infinité d’Edicts, & Declarations
non deuëment verifiez ; ains elle est
obligée de sousmettre ses ordres & mandemens