au iugement du Conseil du Roy, afin de leur donner
par leurs suffrages, le poids & l’efficace des
choses iugées. Or ce Conseil qui a droict d’en
connoistre de la sorte, n’est pas celuy qui suit la
Cour, ou en fait vne partie, veu qu’elle n’est composée
que des Maistres des Requestes dont la
connoissance est tres-limitée, & de Conseillers
d’Estat, qui ne sont point vrais Officiers, ains simples
Commissions que le Roy fait exercer à son
plaisir, mais doit estre celuy où le Roy tient son
lict de Iustice, où les Roys declarent leur plus certaines
volontez en toutes matieres importantes,
c’est à sçauoir le Parlement.

Or s’il est loisible â vn simple particulier, de resister
à vn Magistrat excedant son pouuoir, au
cas qu’il ne veüille deferer à son appel, on ne peut
nier qu’il ne soit beaucoup plus licite à cét Auguste
Senat qui a authorisé la Reyne en sa Regence,
qui represente tous les Estats du Royaume, & qui
tient en depost la principale & plus ferme volonté
du Roy, de s’opposer à ce qu’elle fait, par l’aduis
pernicieux du Cardinal Mazarin, contre les
loix & ordonnances de l’Estat, & par consequent
il luy est aussi permis apres qu’elle a negligé ses
tres-humbles Remonstrances, si souuent reïterées
sur ce suiet, & refusé absolument de les ouïr
en dernier lieu, de se maintenir en sa liberté &
puissance par armes, contre la force & violence,
par laquelle elle le veut contraindre & assuiettir,