il vient comme secourir le party de Monsieur
le Prince, en monstrant par son retour
la Iustice de ses armes. Ainsi ces deux partys
opposez, conspirent aujourd’huy à sa
gloire par des moyens bien differens & par
des voyes contraires, puis qu’ils seruent à
mesme temps à soustenir, ou à iustifier l’Innocence
de ses desseins, & la bonté de sa
cause. Vous allez voir l’vn dans la marche de
Monsieur le Prince, & l’autre dans celle du
Mazarin.

Il n’appartient qu’aux grands courages
de sçauoir triompher des saisons aussi bien
que vaincre les hommes, & de chercher les
occasions de combattre en des temps où les
autres trouuent les moyens de se reposer.
Bien que l’Hyuer ne soit pas propre pour faire
des Campagnes, il sert neantmoins à
Monsieur le Prince pour faire de grandes
actions : Et comme si l’ardeur de son courage,
ou le zele qu’il a pour le bien de l’Estat
l’empeschoit de sentir les rigueurs du froid,
il expose son illustre personne aux incommoditez
de cette saison, pour ne perdre pas
vn moment dans vne guerre si importante
& si juste, & pour faire voir à tout le monde,
qu’il sçait cueillir des Lauriers, mesmes
parmy les neiges & les gelées.