Pour s’en aller dans la Sauoye.
Ce pendart esperoit pourtant
Auparauant son partement
D’en leuer nostre puissant Roy,
Mais ce n’est pas pour luy ne foy,
Car tous les Messieurs de la Fronde
Qui sont gens qui ont rodé le monde
Ont fort bien veu que Mazarin
Vouloit ioüer vn tour de faquin,
Mais s’en sont bien donnez de garde
Posant tous les iours la garde
Dans tous les endroits dangereux :
Ha que le voila bien peneux,
Le voila qui se desespere
Voyant qu’il ne gaigne de guere
Il deuoit plustost s’en aller
Que dans la France demeurer,
Mais le voicy qui se resout
De s’en retourner tout d’vn coup
Dans quelque païs esloigné
Pour se faire testiculer,
Et l’on dira voicy ce Iule,
Ce Cardinal sans testicule,
Le voila le pauure matois
Esloigné des reignes & des Roys,
Particulierement de la France
D’où il emporte la finance.

page précédent(e)

page suivant(e)