[retour à un affichage normal]

Mazarinade n° B_15_27

Image de la page

Anonyme [1652], L’AVTHORITÉ DES ROYS, DES PRINCES, DES REPVBLIQVES, ET DES PARLEMENS. Presenté au Roy dans la Ville de Pontoise par vn grand Prelat. , françaisRéférence RIM : M0_434. Cote locale : B_15_27.

de son deuoir, qui luy donna audience, & retourna
tout court luy faire iustice : Le bon Empereur Traian
est fort loüé & remarqué des historiens, en ce qu’vn
iour estant monté à cheual pour aller à la guerre, il
mist soudainement pied à terre, pour oüyr la plainte
que luy vouloit faire vne pauure femme. Les Hebrieux
demandans vn Roy à Samuel, adiousterent,
entr’autres causes de leur Requeste, ces mots, pour
nous iuger & faire iustice comme les autres peuples.
Ce qu’ont tres-bien pratiqué plusieurs des bons & anciens
Rois de France : mesme le Roy sainct Louïs,
comme recite le sieur de Ioinuille, en son histoire
qu’il a escrite de la vie dudit Roy.
 
Aussi est-ce la Iustice qui par la grace de Dieu, fait
florir les Royaumes & Monarchies, & qui attire la
benediction de Dieu sur le Prince & sur les sujets, &
les fait tellement prosperer, que toutes leurs affaires
succent heureusement, & viennent à bonne fin, selon
que dit l’Escriture, qu’aux bons toutes choses
cooperent & reuiennent à bien : Comme au contraire,
mille calamitez & malheurs accueillent, & enfin
ruïnent & accablent, les Royaumes où la Iustice est
negligée, & non exercée égallement en ce qui touche
la pieté.
Dont vous estes grandement menassé, & vostre
Royaume, auquel il n’y a comme plus de pieté, ny
autre iustice humaine, ains seulement vn masque, vn
fard, vn déguisement, & vne simple apparence, ou
(pour mieux dire) vn ombre de Iustice, au regard de
ce qui deuroit estre. Chose qui se doit dire à l’ouuert,