[retour à un affichage normal]

Mazarinade n° B_15_27

Image de la page

Anonyme [1652], L’AVTHORITÉ DES ROYS, DES PRINCES, DES REPVBLIQVES, ET DES PARLEMENS. Presenté au Roy dans la Ville de Pontoise par vn grand Prelat. , françaisRéférence RIM : M0_434. Cote locale : B_15_27.

n’aurez iamais de telles gens, vn bon & solide
Conseil. Ils ne feront que tornoyer & conniller,
temporiser, flatter, seruir à vos passions, mentir,
piper, desguiser la verité, & postposer Dieu & sa
Religion, à leur credit & auancement.
 
Disposez-vous donc, SIRE, pour l’honneur
de Dieu, pour vostre repos & celuy de vos sujets,
à vous laisser vaincre de raison, à prendre & suiure
bon Conseil, & à traicter vos affaires en toute verité
& sincerité de bonne affection, sans plus vous
tenir ny arrester aux mauuais conseils que l’on vous
donne, ny aucunement vser de pratiques & promesses
enuers plusieurs de vos suiets, pour les destourner
de faire chose qui vous desplaise. Et croyez
asseurément, que cheminant en vos affaires par la
voye de vertu, vous ferez plus d’affaires, et auec
plus de prosperité et de reputation, qu’en pratiquant
les vilains et impies conseils de Machiauel,
esquels on vous nourry encore aujourd’huy.
Et pour vous y inuiter dauantage, souuenez-vous
en toute reconnoissance de Dieu, de la prosperité
de vos ieunes ans, et que vous auez eû les
plus heureux commancemens que vous eussiez pû
souhaiter : Dieu vous ayant fait la grace en vostre
plus grande ieunesse, d’auoir conduit & commandé
les armées en France : En laquelle charge, vous
auez triomphé de vos ennemis par frequentes &
continuelles victoires, par le moyen desquelles,
vous auez maintenu la Religion Catholique, &