[retour à un affichage normal]

Mazarinade n° B_15_27

Image de la page

Anonyme [1652], L’AVTHORITÉ DES ROYS, DES PRINCES, DES REPVBLIQVES, ET DES PARLEMENS. Presenté au Roy dans la Ville de Pontoise par vn grand Prelat. , françaisRéférence RIM : M0_434. Cote locale : B_15_27.

mauuais vne partie de sa vie, il faudroit souhaiter
que ce fust au commencement, & qu’il acheuast
bien, plustost que le contraire : Car la fin couronne
l’œuure, & Dieu nous iugera par la fin de nos iours,
& au depart de ce monde : Ce sera lors qu’il fera iustice
sans respect de grandeur & de Royauté. Et
comme il est retributeur des bonnes œuures, aussi
est-il iuste punisseur & vangeur des mal-faits. En
telle maniere (dit le sage) que parauenture sera-t’il
fait misericorde au petit & infirme, mais aux grands
& puissans, iugement sera fait sans misericorde, &
les puissants de ce monde qui auront abusé de leur
authorité, endureront les plus grands tourmens.
 
Ie vous supplie tres-humblement (SIRE) excuser
la hardiesse de mon discours, & l’attribuer à
la fidelité, amour, & zele, que i’ay au seruice de
mon Dieu & au vostre, comme d’vne part ie recherche
la gloire de Dieu, & vostre salut, Ie crains
d’autre part vostre ruine & la nostre, laquelle semble
estre bien proche, par les signes apparens que nous
en voyons, & laquelle il faudra tenir pour toute
asseurée quand l’on verra que vous ne tiendrez
compte de ces aduertissemens, estans chose tres ordinaire
& tesmoignée par infinies histoires sacrées
& prophanes, que iamais Dieu n’a puny les Roys &
les peuples, ny ruiné les Estats & Monarchies, sans
auoir au precedent donné beaucoup de signes &
aduertissemens, & que la plus apparente marque de
ladite ruine, & d’vne reprobation de Dieu, a esté