[retour à un affichage normal]

Mazarinade n° B_15_27

Image de la page

Anonyme [1652], L’AVTHORITÉ DES ROYS, DES PRINCES, DES REPVBLIQVES, ET DES PARLEMENS. Presenté au Roy dans la Ville de Pontoise par vn grand Prelat. , françaisRéférence RIM : M0_434. Cote locale : B_15_27.

non seulement quand les Princes & les peuples
n’ont tenu compte des bons aduertissemens, mais
principalement quand ils s’en sont mocquez, &
qu’ils les ont meprisez, ou bien quand ils s’en sont
irritez & courroucez : Ie prie Dieu (SIRE) qu’il
vous garde d’en faire ainsi.
 
C’est ainsi (SIRE) qu’il vous faut viure pour
bien seruir & glorifier Dieu. Toutes choses vous y
inuitent : & le nom mesme que vous portez vous
doit induire à vne souuenance continuelle du braue
& genereux patron duquel vous l’auez emprunté,
qui est le Roy Sainct Louys, lequel de son
viuant a esté vn grand & magnifique Monarque,
cheminant en la crainte de Dieu, gardant ses commandemens,
en l’obeyssance de l’Eglise Catholique.
Il a sagement gouuernemé ses sujets & leura
tousiours fait bonne Iustice. En reconnoissant le
deuoir de sa charge, il a bien reconnu qu’il en deuoit
rendre conte à vn autre plus grand Empereur
& Monarque que luy. A raison dequoy s’y estant
conduit droictement, Dieu la recompensé d’vn
Empire eternel en sa gloire celeste, beaucoup plus
excellent & beau, qui n’estoit le premier terrestre
& caduque.
Imitez, SIRE, en vostre vie ce bon Empereur
& gouuernez vostre Royaume comme il a fait le
sien, & vous en serez recompensé comme luy, non
seulement de la gloire de Dieu qui vous en sera
donnée & communiquée auec les bien-heureux en