[retour à un affichage normal]

Mazarinade n° B_17_31

Image de la page

Anonyme [1652 [?]], SECONDE PARTIE DV POLITIQVE VNIVERSEL, OV BRIEVE ET ABSOLVE DECISION de toutes les questions d’Estat les plus importantes. SCAVOIR EST, VIII. S’il y doit auoir vn premier Ministre d’Estat. IX. Si tous les Ministres d’Estat ne doiuent pas auoir vne égale puissance. X. Si les Princes, l’Estat, & les peuples peuuent estre pis ou mieux, dans cette egalité de Mnistres (sic). XI. Si l’on doit receuoir vn estranger dans le Ministere. XII. Si l’on doit souffrir qu’vn seul Ministre gouuerne tous les affaires de France. , françaisRéférence RIM : M0_2818. Cote locale : B_17_31.

parce qu’il est le seul tiré apres le naturel,
d’vn Original infaillible : Mais il n’en est pas
de mesme des Ministres qu’vn souuerain doit
tenir tous également dans vne esgalle puissance ;
parce qu’il se rencontre tousiours quelque
conflit de qualitez entre des sujets, égallement
soubmis, quand il s’y en trouue quelqu’vn qui
veut suppediter les autres. C’est d’où naissent
tous les desordres de la nature, & qu’il fait fort
mauuais prendre pour exemple dans le Conseil
souuerain, si l’on ne veut mettre tous ses affaires
en desordre. C’est pourquoy cette prouidence
infinie qui fait regner l’ordre dans toutes
les parties qui composent ce grand tout, a
voulu separer les élemens l’vn d’auec l’autre, en
leur donnant vne égalité de puissances, afin
que malgré la grandeur de leurs cõtraires qualitez,
ils se trouuassent en estat de gouuerner
les affaires de l’Vniuers sans aucun desordre.
 
La raison de cecy en est tres belle & tres excellente :
c’est que dans la diuision de la puissance,
la discorde ne manque pas de si trouuer ;
& c’est la ruine de toutes les choses ; car comme
l’amour & la sympatie sont les causes qui
produisent tous les estres du monde, ainsi la
haine & les antipathies sont les causes qui desolent
& qui detruisent toutes les choses de la terre.
C’est pourquoy cette Deesse que Iupiter