[retour à un affichage normal]

Mazarinade n° C_3_9

Image de la page

Davenne, François [?] [1650], LETTRE PARTICVLIERE DE CACHET envoyée par la REYNE REGENTE A MESSIEVRS DV PARLEMENT. Ensemble vne response à plusieurs choses, couchées en la Lettre envoyée au Mareschal de Turennes, & aux avis donnez aux Flamans. , françaisRéférence RIM : M0_2250. Cote locale : C_3_9.

promettant par la voye du vice vn repos qu’on ne peut obtenir
que par le chemin de la vertu : quoy qu’ils sçachent qu’vne
mauuaise cause ne peut produire vn bon effect. Lisez à present
les Souspirs François sur la Paix Italienne, & vous verrez vn
Prophete qui a predit les malheurs de ce temps. Iettez en suite
la veuë sur la response qu’on y fit, & vous contemplerez vne
vaine qui merite la malediction de la terre & du Ciel. C’est à
present que ces deux pieces doiuent estre examinées mot à
mot, & non pas au moment qu’elles se firent en chaleur. Elles
ont pris vn autre visage : la verité de l’vne, & le mensonge de
l’autre, y sont par experience appointées contraires tout à fait.
 
 
Arracher la Paix des Prouinces,
Aigrir les Peuples & les Princes,
Taxer vn Auguste Senat,
Et comme vne horrible furie,
Bouleuerser tout vn Estat,
Est ce là seruir sa Patrie ?
 
Cette horrible
periode est
couchée à la
fin de la refutation,
qui
fut faite aux
Soupirs François,
sur la
Paix Italienne,
Voila ce qu’on dit contre les Souspirs François : mais ie responds
par son mesme discours à l’Autheur de ce Sixain.
 
La fausse Paix dans les Prouinces,
Rend-elle bien heureux les Princes,
Non plus que l’Auguste Senat,
Et d’auoir par la flatterie
Acheué de perdre l’Estat,
Auez vous seruy la Patrie ?
 
La bonne guerre auroit-elle arraché la Paix des Prouinces,
& la fausse paix y a-t’elle mis la tranquillité ? La bonne guerre
auroit-elle aigry les Peuples ny les Princes, puis qu’elle les auroit
menez à vn sainct repos ? Et la fausse paix de Mazarin à-elle
pacifié les peuples ny leurs Altesses, puis qu’il bouleuerse les
vns dans les Prouinces, & qu’il tient les autres dans vne prison ?
Est-ce mal fait de taxer vn AVGVSTE SENAT quand il s’oublie,
puis que c’est pour son bien ? Et est-ce bien fait de le flatter
quand il prend le change, puis que c’est pour son mal ? appellez
vous renuerser l’Estat, estre vne horrible furie, & ne seruir
pas son pays, quand on luy conseille la generosité qui le
peut sauuer ? Et est ce en estre le protecteur, le defendre, & luy
faire vn bon office de l’auoir confirmé dans vne lasche Paix