[retour à un affichage normal]

Mazarinade n° B_15_36

Image de la page

Duval, Jean [?] [1652], LA VERITABLE SVITE DV PARLEMENT BVRLESQVE DE PONTHOISE, CONTENANT LES NOMS & les Eloges de quatre nouueaux Renegats, & la Harangue faite par Mazarin à son départ. Par l’Autheur de la premiere partie. , françaisRéférence RIM : M0_3964. Cote locale : B_15_36.

LA VERITABLE SVITE DV
Parlement burlesque de Ponthoise, contenant les
noms & les Eloges de quatre nouueaux Renegats,
& la Harangue faite par Mazarin à son départ.
 
Allez vous… Monsieur le Badaut.
Dans la colere peu s’en faut
Quoy qu’il soit auiourd’huy Dimãche,
Que le villain mot ie ne tranche.
 
 
Peste i’ay grande patience eu,
Quand d’vn bout à l’autre i’ay leu
Vn certain ouurage crotesque,
Que vous nommez Suitte Burlesque
De mon Burlesque Parlement :
Mais c’est parler improprement
Lors que vous luy donnez ce titre,
Dites response à mon Epitre,
Mais vne response de chien,
Response si ie saisois bien
Et si i’estois d’humeur critique,
Que ie laisserois sans replique.
 
 
I’ay pourtant la demangeaison
(Et cela pour bonne raison)
De donner du Senat la suitte,
Que l’appellant point ne visite,
Ny demandeur ny deffendeur ;
Ie l’addresse à tout bon Frondeur.
 
 
Vn matin donc faisant reueuë,
Ie vis qu’on auoit fait recreuë,
D’vn quatorze d’ensoutannez
En francs Mazarins façonnez.
 
 
Le premier auoit grosse pance
Et des tripes en abondance,
Ce qui fit que d’abord ie creu,
Que cét homme estant si ventru
Estoit dans cette singerie
Pour acheuer la momerie,
Et comme il n’estoit pas menu
Qu’il auoit esté retenu
Comme vn Farceur dans jeu de Paume
Pour contrefaire gros Guillaume.
 
 
Le deuxiesme auoit vn minois
De s’enyurer souuentefois,
Et son nez fait en betteraue
Me le fit croire vn rat de caue.
 
 
Le troisiesme estoit vn noiraut
Qui venoit du pays d’haraut,
Et qui me portoit bien la mine
D’estre vne meschante vermine
Ce beau Iuge est emperruqué
Et semble estre tout disloqué.
 
 
Le dernier de cette recreuë
Est, si ie n’ay point la berluë,
Et sans luy donner sobriquet
Aussi camus qu’vn chien turquet.
 
 
Quand ie vis ces nouueaux visages
Plaquez la comme des images.
Ie m’aprochay d’vn Villageois,
Qui clabaudoit en son patois
(C’estoit vn Huissier de seruice)
Qu’on se taise, & qu’on obeïsse :
Sans sujet, car ie suis garend
Que le silence estoit bien grand
Parce que dans cette boutique
Il n’est pas vn brin de pratique.
 
 
Ie luy demanday, ces cornus
Qui sont nouuellement venus
Viennent-ils pour gagner leur vie,
Estre Acteurs de la Comedie.