[retour à un affichage normal]

Mazarinade n° B_15_15

Image de la page

Anonyme [1652], EXAMEN DES DIVERS SENTIMENS SVR L’ARREST DV Parlement du 20. Iuillet. Et du Discours seditieux sur la Lieutenance. Ou responce à la piece de Pontoise. , françaisRéférence RIM : M0_1318. Cote locale : B_15_15.

ne peust passer pour temeritê. Le Parlement
n’est poïnt injuste ny Monsieur Criminel.
Mais c’est la violence du gouuernement & les
attentats du C. Mazarin qui ont obligé l’vn &
l’autre de recourir à vn remede extraordinaire.
Il ne sert de rien de recourir à l’Hystoire laquelle
ne marque que deux Lieutenances à sçauoir
celle du Nauarrois pendant la prison du Roy
Iean, & celle du Duc de Mayenne, pendant les
troubles de la Ligue. Cettuy cy contestoit la
Royauté à l’heritier de la Couronne soubs pretexte
de Religion, mais nous ne cõtestons point
l’authorié souueraine à nostre Monarque, nous
faisõs la guerre à celui qui la vsurpee & celui qui
pretẽd de conuaincre vne opinion d’erreur parce
qu’il n’y a que les Heretiques qui l’ont tenuë, me fait
soupçõner qu’il est vn reuolté & qu’il a quitté la
veritable reigle de la verité qui n’est point prise
des preiugez mais de la conformité à la reuelation
Diuine.
 
Il dit que le souuenir de la responce de Henry
IV. qui se nomma premier Magistrat du Royaume,
marque plus de memoire que de iugement. Et pour
moy i’estime que c’est la propre definition de
l’authorité Souueraine, que c’est l’essence de la
Royauté. puisque c’est le premier Office des
Roys de terminer les differens de ceux qui sont
dans vne mesme societé ciuile. Si l’on recherche