[retour à un affichage normal]

Mazarinade n° B_13_28

Image de la page

Anonyme [1652], LES TRAHISONS DESCOVVERTES DE MAZARIN DANS LE CONSEIL de la Reine, pour empescher la Conference de Messieurs les Deputez. , françaisRéférence RIM : M0_3793. Cote locale : B_13_28.

voye que le plus grand de tous les Rois, se serue pour maintenir
le dissipateur de son Estat, de la derniere de toutes les
ressources que la necessité la plus vrgente pourroit obliger le
moindre sujet de chercher pour donner creance à ce qu’il
voudroit persuader au public, sans considerer que de certaines
circonstances peuuent authoriser dans l’esprit des peuples
les asseurances qu’vn particulier luy donnera, & que les
mesmes destruisent la verité des paroles Royales, qui n’estant
autre chose qu’vne ingenuité de cœur toute pure, ne souffre
point d’artifice : La naifueté la plus simple fait de plus fortes
impressions dans nos esprits, sortant de la bouche du Roy,
que toutes les figures de Rhetorique les mieux inuentées :
c’est pourquoy les choses qui nous sont données de la part de
sa Majesté, auec tant de politesse & d’exageration, nous persuadent
bien souuent le contraire de ce que l’on s’est proposé,
& fait dire en mesme temps aux plus aduisez, que la verité
se fait connoistre d’elle-mesme, & dez que l’on y voit
tant de couleur, que c’est vn piege que l’on tend pour
surprendre nostre simplicité, parce que l’on sçait bien qu’vn
Souuerain ne s’estudie point à parler auec tant de precaution,
que quand il veut nous persuader quelque chose, qui
estant suspecte, ou tout a fait fausse, a besoin de deguisement
pour auoir passage dans nos esprits, souz les belles apparences
qu’il luy donne : C’est cette raison qui nous fait cognoistre
aujourd’huy que toutes ces Lettres escrites auec tant
d’artifice, & si contraires à la simplicité de ceux qui agissent
à la bonne foy, ne sont point l’ouurage du grandRoy comme
le nostre, qui agissant auec sincerité ne se contredit iamais.
Mais que c’est vne ruse Mazarine pour surprendre les plus
sots. Et pour refroidir ceux qui ne sont pas beaucoup eschauffez
pour le bien des Peuples.
 
C’est à vous genereux Parisiens à prendre si bien vos mesures,
que distingant le vray du faux, vous ne vous laissiez
point surprendre par les souplesses de vostre ennemy mortel :
Qui ne manquera point de vous enuoyer souuent des escrits
au nom du Roy pour tromper vostre facilité. Dans l’assurance