[retour à un affichage normal]

Mazarinade n° B_14_45

Image de la page

Anonyme [1652], LES VERITABLES MOTIFS DE LA RETRAITE DE MONSIEVR LE COMTE D’HARCOVRT, ET LES IVSTES RAISONS qui l’ont obligé de quitter le Commandement de l’Armée Mazarine. , françaisRéférence RIM : M0_3970. Cote locale : B_14_45.

au dépend de son honneur, & de ses charges qu’il
a bien meritées, on éleue vn petit Italien que le vent de
la seule faueur y pousse sans en estre digne, & ce luy sera
vn creuecœur qui n’est pas imaginable quand il verra
ce prodige de fortune, & ce fantosme d’Estat occuper
vne place qu’il estoit seul capable de remplir sans que
pas vn des Mazarins osast luy debattre iamais.
 
Mais quelque disgrace que soit la siẽne, quelque perte
qu’il semble faire elle ne luy est point fatale au poinct
qu’on pourroit croire, puisque par là il reconnoit veritablement
que le Cardinal est vn méchant, que ceux
contre lesquels il l’obligeoit à combattre ont la Iustice
de leur costé, & que par ce moyen ayant connu par experience
la verité & la sincerité de leur procedé il quittera
auec detestation ce party d’iniquité ; Il embrassera
tout de bon la cause publique, & suiura les bonnes volontez
de Nosseigneurs les Princes qui luy paroistront
à present dans leur iour & dans leur Iustice, il s’est desia
retiré en Languedoc pour cét effet, il est vray que sur
sa marche il y auoit ordre à vn certain Gouuerneur de
Ville que ie ne nomme point de l’arrester, & se saisir de
sa personne, mais ce genereux Gentilhomme connoissant
bien que cét ordre estoit inique, en a donné aduis à
Monsieur le Comte d’Harcour, luy témoignant en cette
occasion que la dignité de sa personne & sa parfaite generosité
meritoit ce bon office.

FIN.