Mazarinade n° A_6_44
Image de la page
Anonyme [1649], NOVVELLES APPORTEES AV ROY LOVIS XIII. DANS LES CHAMPS ELISEES, Et son entretien auec les Heros & les principaux Seigneurs de sa Cour, touchant la funeste guerre que Mazarin a allumée dans la France. Et la description des principales choses qui sont arriuees depuis l’enleuement du Roy, qui est tout l’Histoire du temps. , françaisRéférence RIM : M0_2555. Cote locale : A_6_44.
tous ses Seigneurs, que nous auons nommez, & plusieurs autres
qui s’estoient rendus prés de sa personne, pour apprendre
les particularitez de ce qui se passoit en France, depuis que la
guerre ciuile y auoit esté allumée. L’on vit venir à grande haste
vn des Officiers qui estoit en garde à la porte des Champs Elizées,
qui estant arriué prés du Roy, luy dit, Que tout presentement
quelques Officiers des plus vaillans de l’armée du Mazarin,
auoient passé au deça du fleuue d’Acheron, & que Charon
sçachant qu’ils pourroient apprendre des nouuelles à vostre
Maiesté les auoit enuoyez à la porte, mais que l’entrée leur
en estant interdite, ils luy auoient dit tout ce qui estoit arriuée
de plus considerable depuis l’arriuée de Monsieur Chastillon.
Dites-nous donc promptement, dit le Roy, tout ce qu’ils vous
ont raconté. SIRE, ie suis venu icy pour cela : Le plus apparent
d’entr’eux est vn Huguenot, nommé le sieur de Nerlieu,
Maistre de Camp d’vn regiment de Caualerie, qui a esté tué
par le vaillant Duc de Beaufort, en vne occasion assez remarquable ;
car comme ce vaillant & genereux Prince, &
Monsieur de la Mothe-Houdancourt escortoient vn grand
conuoy qui venoit du costé d’Estampes ; le Mareschal de Gramont,
qui est du costé du Cardinal, ayant esté commandé de
les venir attaquer, pour dissiper & empescher ce conuoy d’entrer
dans Paris, il fut défait & contraint de se sauuer à la faueur
de son infanterie ; & quoy que ceux du party de Mazarin fussent
deux fois plus forts en nombre de gens, l’on en tua pourtant
plusieurs, qui me viennent d’apprendre ses nouuelles.
Alors le Mareschal de Gassion, qui connoissoit Nerlieu fort
particulierement, dit tout haut : C’est grand dommage que ce
braue homme soit mort en vne si mauuaise & si honteuse occasion ;
il estoit hardy & sçauant au mestier : Et quand ie me souuiens
du ieune Tancrede de Chastillon, du Comte de Saligny
son cousin, de Clanleu, & de tant d’autres vaillans hommes,
qui sont desia morts aussi bien que celuy-cy en cette meschante
guerre, i’enrage contre ce perfide qui est la cause que la
France s’arrache elle-mesme ses propres entrailles, & que tant
de vaillans François se tuënt les vns les autres, au lieu de pousser
leur fureur contre ce Demon, qui semble estre d’accord
Image de la page