[retour à un affichage normal]

Mazarinade n° C_6_34

Image de la page

Anonyme [1649], NOVVELLES APPORTEES AV ROY LOVIS XIII. DANS LES CHAMPS ELISEES, Et son entretien auec les Heros & les principaux Seigneurs de sa Cour, touchant la funeste guerre que Mazarin a allumée dans la France. Et la description des principales choses qui sont arriuees depuis l’enleuement du Roy, qui est tout l’Histoire du temps. , françaisRéférence RIM : M0_2555. Cote locale : C_6_34.

point allé secourir cette Place, mais l’on
allegua de si puissantes raisons qui l’en auoient
empesché, que son honneur boüillante & guerriere
en fut satisfaite. L’on apprit aussi que les Parisiens
auoient fait des courses à six ou sept lieuës
de Paris, du costé de Gonesse & de Senlis, & qu’ils
en auoient apporté beaucoup de bled & de farine.
Mais ce qui resiouyt le plus, c’est qu’on sçeust aussi
que Mr de Longueville auoit eu de tres-grands
auantages sur les troupes Mazarines en Normandie,
& que son secours estoit tout prest à venir
joindre l’armée des bons François : & ce qui donnoit
encore esperance que nos miseres finiroient
bien-tost, c’est qu’on sçeust aussi que l’ouuerture
d’vn accommodement auoit esté faite à saint Germain,
& que la Cour auoit deputé des Presidens &
des Conseillers de toutes les Chambres, tres-gens
de bien, pour aller essayer d’appaiser les troubles
intestins ; & en suitte songer aux plus honnorables
moyens de faire vne paix generalle auec l’Espagne ;
Dieu vueille benir leurs saintes intentions, &
exterminer ceux qui esloignent la paix, & qui ont
tousiours fomenté la guerre au scandale vniuersel
de la Chrestienté.