Mazarinade n° B_11_23
Image de la page
Anonyme [1652], OBSERVATIONS VERITABLES ET DES-INTERESSEES, Sur vn escrit imprimé au Louure, INTITVLÉ LES SENTIMENS D’VN FIDELLE SVIET DV ROY, Contre l’Arrest du Parlement du 29. Decembre 1651. Par lesquelles l’authorité du Parlement, & la Iustice de son Arrest contre le Mazarin, est plainement deffenduë; & l’imposteur qui le condamne entierement refuté. Par vn bon Ecclesiastique tres-fidelle sujet du Roy. PREMIERE PARTIE. Qui iustificat impium, & qui condemnat iustum; abominabilis est vterque apud Deum; Prouerb. cap. 17. vers. 15. , français, latinRéférence RIM : M0_2574. Cote locale : B_11_23.
à la raison, & ne prendre conseil de personne. Les Remonstrances
que le Parlement a presentées à sa Majesté estant à
Sully, portent que, Henry le Grand son ayeul, estant pressé
de faire vn Edict nouueau dans le Parlement, ayant appris par
la bouche de Monsieur de Harlay premier President, que ce
qu’il desiroit contre les Loix ne pouuoit passer qu’en employant
sa puissance absoluë, ce Prince juste & clement, dit ces
paroles dignes de luy. A Dieu ne plaise que ie me serue iamais
de cette authorité Souueraine qui se destruit souuent en la
voulant establir, & à laquelle ie sçais que les peuples donnent
vn mauuais nom. Louys XI. le plus violent & le plus imperieux
de tous nos Rois, n’en fit pas moins apres auoir entendu Monsieur
le premier President de la Vacquerie, qui luy porta sa teste
auec tout le Parlement en robbe Rouge, pour luy declarer
que luy & la Compagnie aimoient mieux vne mort glorieuse,
qu’vne vie esclaue & chargée de honte, & que le deuoir de
leurs consciences leur estoit plus cher & plus precieux, que
l’obeïssance injuste & criminelle qu’il desiroit d’eux.
Harangue
de Monsieur
Nicolaï, premier
President
de la
Chambre des
Cõptes, dans
l’histoire du
temps, fol.
269.
Si donc les Rois les plus absolus, & les plus experimentez
dans les affaires sont obligez de prendre conseil, & de deferer
aux bons aduis qu’on leur donne dans les choses importantes ;
Sera-ce vn ignorant, vn trompeur, vn impie, vn perfide, vn
pirate, vn voleur public, vn estranger, vn criminel, & vn proscrit
comme est le Mazarin, qui aura la Sur-Intendance de l’Education
d’vn jeune Roy, & qui sera le maistre de son esprit & de ses
volontez pour l’esloigner des Princes de son Sang, & de son
lict de Iustice, & pour abuser de son nom & de son authorité
plus librement. Et parce que les Princes du Sang, & tous les
Parlemens du Royaume s’y opposent, comme ils y sont obligez
deuant Dieu & deuant les hommes, cét insolent fait escrire
qu’ils sont des rebelles & des seditieux, ne sçachant pas ce que
c’est d’aimer vn Roy, & de conseruer vn grand Estat qu’il prostituë
à sa haine & à son ambition ; & qu’vne des lumieres de
l’Eglise plus esclatante & plus croyable que luy a dit en semblable
rencontre, qu’on peut legitimement s’opposer aux entreprises
& aux desseins des Tirans, quand ils sont cruels & temeraires,
sans que cét obstacle & cette resistance puisse estre
qualifiée du nom de sedition, mais le remede d’icelle ; Illis nomen
Image de la page