Mazarinade n° A_8_70
Image de la page
Anonyme [1649], RELATION GENERALE ET VERITABLE DE TOVT CE QVI C’EST fait au Procez du Roy de la Grand’Bretagne. SON ARREST, ET LA MANIERE
de son Execution. Auec la Harangue faite par Sadite Majesté sur l’Eschaffaut. TRADVIT D’ANGLOIS EN FRANCOIS, par I. Ango Interprete de ladite langue, sur l’imprimé à Londres, par François Coles. , français, latinRéférence RIM : M0_3174. Cote locale : A_8_70.
A Beuerley en la Comté d’York, à Nottingham (lors qu’il y
planta son Estandart de guerre) à Edghill, & Keinton Field, à
Brainchford, au Pont de Cauesham, au siege de Glocester, à la bataille
de Neubery, à Bodmin & autres places en Cornoüaille, à la
ville de Leicester, au Camp de Naseby & plusieurs autres places.
Qu’il a esté cause que plusieurs mil de ce peuple & ceste nation libre
ont esté tuez, & des diuisions & sousleuements de ce païs par l’inuasion
des Estrangers, & par plusieurs autres meschantes voyes &
moyens. D’auoir donné des Commissions au Prince son fils & autres
rebelles & reuoltez, tant Anglois que Forains associez auec
luy, lesquels menacent le pays de plus grandes inuasions, à la poursuitte
& pour l’interest dudit Charles Stuart.
Tous lesquels mauuais desseins & meschantes pratiques, se sont
faites & se font pour aduancer & maintenir son interest particulier,
& la puissance & pretenduës prerogatiues de luy & de sa famille
contre l’interest public, le droict commun la liberté, Iustice & la
paix du peuple de cette nation, laquelle auoit mis sa confiance en
luy, comme dit est.
Par toutes lesquelles menées il appert que ledit Charles Stuart
est autheur desdites inhumaines, cruelles & sanguinaires guerres,
& partant criminel de toutes les trahisons, meurtres, tapines, bruslements,
degasts, desolations, dommages & malheurs de cette nation,
& de tout ce qui a esté fait & commis à cause de ladite guerre.
Le Samedy sixiéme de Feburier la Chambre de Iustice prit seãce
en la Salle de VVestminster, le President reuestu d’Escarlatte, &
apres l’appel ordinaire de la Chambre, le Roy vint en sa maniere
accoustumée son chappeau à sa teste. Comme il passoit au milieu de
la Salle, il se fit vn cry du peuple demandant que iustice & execution
fust faite : le Roy estant venu il demanda à estre ouy, le President
luy respondit qu’il falloit premierement le sçauoir de la Chãbre,
& aussi tost le President fit voir les intentions de la Chambre,
& demanda aussi qu’il fust permis au Roy de parler, pourueu qu’il
ne tombast pas en matiere de debat, le Roy demanda (eu esgard
qu’il auoit quelque chose à dire pour la paix du Royaume & la liberté
des subjets) qu’il fust ouy deuant les Seigneurs & les Communes
en la Chambre dorée auant que l’Arrest fust prononcé. Ladessus
la Cour se retira dans la Chambre des VVards & le Roy chez
le Cheualier Robert Cotton, & apres viron demy heure de debat,
la Cour reuint de la Chambre des VVards auec cette resolution,
que ce que le Roy auoit demandé n’estoit que pour dilayer, toutesfois
Image de la page