[retour à un affichage normal]

Mazarinade n° B_6_28

Image de la page

Anonyme [1651], REMERCIMENT FAIT AV ROY PAR MADAME LA PRINCESSE, SVR LA DELIVRANCE DE MESSIEVRS les Princes. , françaisRéférence RIM : M0_3284. Cote locale : B_6_28.

affaires, & qui auoiẽt la faculté de lire dans les choses
à venir, estimoient qu’elle estoit impossible sans la deliurance
de Messieurs les Princes. Quand on disoit
que vostre Maiesté nous auoit esté donnée de Dieu en
nos plus grandes necessitez, & lors qu’on y songeoit
le moins, pour mettre l’Estat en sa plus grande splendeur,
pour vaincre tous ces ennemis, & pour faire adorer
Iesus-Christ par toute la terre habitable, on disoit
que tout cela estoit fort visible : mais que pour y
reussir heureusement, il faloit que Monsieur le Prince
fut de la partie, afin de surmonter auec plus de facilité
tout ce qui se voudroit opposer à de si glorieuses &
si faintes entreprises. Ouy, SIRE, vous pouuez attendre
de luy, ce que les Grecs attendoient auec tant de
passion des dessendans d’Hercule, qui sont des Miraculeux
exploits, meslez de Cõseil & de Sagesse. Ouy,
SIRE, Vostre Maiesté se peut asseurer d’auoir desormais
auprés d’elle vn Prince tres zellé pour la Religion
Catholique, Apostolique & Romaine : & tres
affectionné, & saintement passionné pour vostre seruice.
Bruslant de desir de maintenir sous l’authorité de
vostre nom, la grandeur de vostre Maiesté, le bien public,
la gloire de l’Estat, & de preuenir tous les desseins
des ennemis de cette Couronne. Ouy, SIRE, Vostre
Maiesté se peut bien asseurer d’entendre desormais
opiner en vostre Conseil, vn Prince stilé aux grandes
affaires, prompt à les conceuoir, vif à les comprendre,
meur à les digerer, & courageux à les executer,
selon le commandement qu’il vous aura pleu de luy
en faire, ainsi que l’ont fort bien remarque ceux qui se
sont seruis de vostre nom & de vostre authorité pour
sa detention, en la Lettre qu’ils ont enuoyée au Parlement
de Paris, le vingtiesme Ianuier, de l’année mil
six cens cinquante.