[retour à un affichage normal]

Mazarinade n° B_2_1

Image de la page

Anonyme [1652], REMONSTRANCE AV ROY POVR LE PARLEMENT DE THOLOZE : TOVCHANT L’AVTHORITÉ DES PARLEMENTS. , françaisRéférence RIM : M0_3296. Cote locale : B_2_1.

tache à vostre Estat, aussi bien qu’il apportoit vne entiere
desolation à vostre Prouince : Il enuoya par tout
des Commissaires pour informer de ces grands desordres,
& pour en rechercher les Autheurs, mais bien
loin qu’à cette menace la malice r’entrast dans les bornes
qu’elle auoit passées, & qu’elle parust pour le moins
respectueuse & soumise ; au contraire, elle tesmoigna
plus d’insolence, elle s’efforça de combattre ce pouuoir
souuerain que vous auez estably pour sa punition.
I’ay desia representé à vostre Majesté les excez dont
elle se rendit coupable à Narbonne, où elle ne reconnoissoit
plus, ny les Loix, ny les Magistrats ; où elle outrageoit,
pour mieux dire, les Magistrats, apres auoir
violé les Loix, où elle vouloit mettre vn crime à couuert
par vn autre crime. Ie suis obligé d’adjouster qu’à
Besiers elle ne se montra pas plus modeste, ny plus retenuë,
qu’elle excita des seditions contre vn Commissaire
du Parlement, qu’elle le mit en danger de sa vie,
qu’elle appella des troupes pour le chasser. Enfin les
crimes que le Parlement poursuiuoit, estoient venus à
vn tel poinct, qu’ils se mocquoient des menaces de la
Iustice. Ce desordre estoit sans doute aussi estrange
qu’il le pouuoit estre, il esbranloit les fondements de la
societé, il troubloit la tranquillité de la Paix ; Il reduisoit
la Iustice à vn tel estat, que si elle n’eust pas vsé de
tout son pouuoir, elle eust perdu toute sa Majesté,
qu’elle ne pouuoit éuiter l’extreme mépris, que par l’extreme
seuerité ; qu’elle ne deuoit pas employer de foibles
remedes à la guerison d’vn mal paruenu à sa plus
grande violence. Qui s’estonnera donc que le Parlement
de Tolose ait decreté prise de corps, & fait en suite
crier à trois briefs iours l’Archeuesque de Narbonne,
qui tout ouuertement, & les armes à la main, se declaroit
le chef des rebelles, & le protecteur des coupables ?
qu’il ait donné vn adiournement personnel contre