[retour à un affichage normal]

Mazarinade n° B_2_1

Image de la page

Anonyme [1652], REMONSTRANCE AV ROY POVR LE PARLEMENT DE THOLOZE : TOVCHANT L’AVTHORITÉ DES PARLEMENTS. , françaisRéférence RIM : M0_3296. Cote locale : B_2_1.

seroient mieux suiuis ? Aussi certes, cette Sainte
Religion eut esté bien odieuse aux Payens en sa naissance,
si elle eust eu des desseins si ambitieux ; si elle eut
voulu mettre au dessus de la Iustice du siecle, tous ceux
qu’elle éleuoit à des charges Ecclesiastiques : On luy
eut reproché que c’estoit auec peu de candeur, & seulement
pour se mettre en la bonne grace des Princes, qu’elle
protestoit de ne vouloir choquer aucune puissance
legitime, ny changer la face de l’Estat auec celle du
culte Religieux. On eut peu auoir mesme de plus mauuais
soupçons : Et il faut aduoüer qu’il est important
pour son honneur que ceux qui l’enseignent aux autres
ne soient pas au dessus des tribunaux de la terre, afin
que si leur vie est innocente, leur reputation puisse estre
pure, que les discours d’vn medisant ayent aussi peu de
prise sur leurs actions, que leur propre vice doit auoir
de pouuoir sur leurs ames, & qu’ils éuitent le soupçon &
le blasme dont les personnes de cette profession ne doiuent
pas estre moins exemptes que du crime mesme, Afin que
personne ne s’imagine qu’on leur ait donné leurs collegues
pour Iuges pour leur donner moyen de pecher
auec impunité, qu’on ait dessein de couurir les ordures
de leurs vices sous la sainteté de la doctrine Chrestienne,
comme sous vn voile esclattant & precieux, & qu’elle
fauorise secrettement la corruption en faisant semblant
de la combattre.
 
Mais on dit, SIRE, que le Parlement de Tolose n’a
pas tousiours esté de cét aduis, & qu’il s’est depuis peu
dementy soy-mesme : Quel est le fondement d’vne si
noire calomnie ? Ses Registres ne verifieront-ils pas le
contraire ? Ne suffisent-ils pas à confondre la malice de
ses ennemis ? Et ne fera-t’on pas voir par la memoire
qu’ils conseruent des choses passées, qu’en cette rencontre
il a esgalement deferé à l’authorité & à la raison,