[retour à un affichage normal]

Mazarinade n° B_2_1

Image de la page

Anonyme [1652], REMONSTRANCE AV ROY POVR LE PARLEMENT DE THOLOZE : TOVCHANT L’AVTHORITÉ DES PARLEMENTS. , françaisRéférence RIM : M0_3296. Cote locale : B_2_1.

qu’il a esté esclairé de la lumiere des bons exemples, &
de celle des saines maximes, qu’il s’est suiuy soy-mesme
aussi bien qu’il a suiuy la justice, ie pourrois adjoûter
encore quelque chose dauantage. Il est certain que
le Parlement de Tolose a autrefois employé contre les
Euesques le pouuoir que vous luy auez commis, auec
plus de rigueur qu’il n’a pas fait à present, & qu’il eut
peu aller plus auant qu’il n’a fait s’il eut voulu entierement
s’imiter soy-mesme. Autrefois comme ses Registres
en font foy, il s’en est seruy contre des Euesques
qui estoient vos Lieutenans dans la Prouince, & qu’il
consideroit pour deux raisons differentes, Les Archeuesques
de Narbonne en particulier ont esté autrefois
comme auiourd’huy les tesmoins de son pouuoir, & les
objets de sa seuerité, Il la faite esprouuer mesme aux Archeuesques
de sa propre ville (ausquels il porte vn respect
particulier) quand il la jugé necessaire ; Quelquefois
en faisant les procez à de semblables preuenus, il a
pourueu au spirituel, comme au temporel, de leurs
Eueschez, il les a tenus dans ses prisons, ou les en a
élargis selon qu’ils ont fait paroistre leur crime ou leur
innocence ; Il les a condamnez à des amendes qu’ils ont
payées auec soûmission, & qui ont esté employées à la
reparation de quelques edifices publics. Et sur ce sujet
il y a & dans le Palais de Tolose, & dans quelques-vns
de ses vieux ponts des pierres qui parlent, & qui rendent
à la verité qu’on nous conteste, & que l’on veut obscurcir,
vn tesmoignage irreprochable.
 
C’est donc en vain que les rebelles fremissent d’horreur,
que les coupables ne peuuent pas approuuer leur
condamnation, qu’ils ne peuuent pas gouster la raison
lors qu’elle leur est ennemie ? Toutes ces nouueautez,
& tous ces prodiges qu’ils se figurent dans la conduite
du Parlement, sont des illusions que l’orgueil & la colere