[retour à un affichage normal]

Mazarinade n° B_2_15

Image de la page

Anonyme [1652], RESPONSE DV ROY, SERVANT DE REPLIQVE, A LA DERNIERE LETTRE DE SON ALTESSE ROYALE. ARTICLE PAR ARTICLE Les Desseruices que les Mazarins ont rendu à sa Majesté, Le changement qu’ils ont faict en ses Conseils, Auec les Moyens de preuenir leurs mauuais desseins. , françaisRéférence RIM : M0_3441. Cote locale : B_2_15.

heures on a de ses nouuelles en Cour, & sçait
ce qui s’y passe, & enuoye les conseils & les ordres
au Conseil qu’il a laissé aupres du Roy, pour
les instruire de ce qu’ils ont à faire. Il a arresté
dans Sedan toutes les armes qui sont aux magasins
des Armuriers. Il a achepté trois mille paires
de pistolets pour six mille caualiers, faisant
son compte de reuenir en France au mois d’Octobre
auec vne armée qu’il leue, ayant pour cét
effet emporté cinq cens mille liures auec luy. Ce
que voyant son Altesse Royale, & que le Mazarin
pretend de repasser ainsi armé, ne iuge pas
à propos de poser les armes, n’y ayant point
d’asseurance pour luy ny pour Messieurs les Princes,
tant que le Roy aura pour conseil trois Anglois,
vn Sauoyard, & vn Italien que Mazarin y
a laissez afin de receuoir & executer ce qu’il leur
ordonneroit.
 
Response. Il ne vous est pas permis de tenir mes
subjects dans l’oppression comme vous faites, de
retenir pres de vous les troupes d’Espagne & au
lieu de les renuoyer en Flandre, comme vous y
estes obligé, d’en faire approcher de Paris vn
plus grand nombre, ie ne sçay quelle excuse
vous pourrez trouuer à ce procedé qui scandalise
tous les gens de bien, & leur donne vne tres-mauuaise
preuue de vostre disposition à la
Paix.