[retour à un affichage normal]

Mazarinade n° C_9_24

Image de la page

Anonyme [1649], SOMMAIRE RELATION DE CE QVI S’EST PASSÉ A S. GERMAIN EN LA DEPVTATION de la Cour des Aydes. POVR LE RETOVR DE LEVRS MAIESTEZ à Paris. AVEC LA HARANGVE DE MR AMELOT premier President, sur ce sujet. ET SA REPLIQVE SVR LA RESPONSE DE MR LE CHANCELIER DE LA PART DE LA REINE, AV SVIET DE L’ELOIGNEMENT DV ROY. , françaisRéférence RIM : M0_3686. Cote locale : C_9_24.

EXTRAICT DES REGISTRES
du Conseil de la Cour des Aydes.

Du 9. Ianuier 1649.
Ce iour les Chambres assemblées, Monsieur Amelot premier
President faisant son rapport de ce qui se passa le iour d’hier à
S. Germain, au suiet de sa Deputation vers le Roy & la Reyne
Regente ; A dit que suiuant l’ordre de la Compagnie il auoit esté
auec Messieurs les Deputez à S. Germain, où ils furent reçeus
à l’ordinaire, & qu’il fit à leurs Majestez la Remonstrance suiuante.
SIRE,
Nos visages, bien differents de ce qu’ils
estoient autrefois, lors que nostre Compagnie
venoit témoigner à V. M. la part qu’elle prenoit
à la satisfaction publique, & aux heureux effets de la
bonne conduite, & de la prosperité de vostre Regne ; peuuent
faire connoistre que c’est auec beaucoup de regret que nous
nous presentons maintenant à V. M. pour vne autre occasion.
Il n’est point de bon François, MADAME, qui ne voulût
auoir vn meilleur obiet de ses pensées & de ses discours, que
les maux de la France ; & si c’estoit assez de les taire, & d’en
détourner la veuë pour les étouffer, nous n’auriõs garde d’auoir
voulu adiouster de nouuelles peines à la foule des soins qui
tiennent V. M. continuellemẽt occupée pour le bien de l’Estat :