[retour à un affichage normal]

Mazarinade n° C_2_55

Image de la page

Anonyme [1649], SOVSPIRS FRANCOIS SVR LA PAIX ITALIENNE. Iouxte la copie imprimée à Anuers. , françaisRéférence RIM : M0_3710. Cote locale : C_2_55.

On a veu les Demons dans ces hommes brutaux
Faire là des excés, & vomir des blasphemes.
Qu’ils n’oserent iamais au fond des enfers mesmes.
 
 
On a veu ces monstres nouueaux,
Des aubes faire des chemises,
Et des housses à leurs cheuaux,
Des saincts ornemens des Eglises,
Iusqu’au pied des Autels on a veu ces voleurs
Forcer les filles & les femmes,
Auec des traittemens infames,
Sans respecter le lieu, ny Dieu ny les Pasteurs,
Qui voulans s’opposer à ces horribles crimes,
De Prestres qu’ils estoient, ont esté faits victimes,
 
 
Ah, François ! où est vostre cœur ?
Où est le sentiment fidele,
Qui doit armer vostre valeur
Contre vne rage si cruelle ?
Et quoy, souffrirez vous qu’vne bande de gueux
Se vante, que vostre Patrie
Souffre d’eux d’estre ainsi flestrie,
Sans lauer dans leur sang ces outrages honteux ?
Laisserez-vous aller tous ces Dommes sans ame,
Emportans vostre bien, & vous laissant ce blâme ?
 
 
A part les interests humains,
Souuenez vous que ces impies
Ont porté leurs profanes mains
Sur nos adorables Hosties,
Et traité Iesus-Christ dans ce S. Sacrement,
De la façon plus detestable,
Que pouuoit conseiller le Diable,
Iusqu’à faire dessus, leur plus sale excrement.
O Ciel ! n’as-tu point eu de foudre pour ces crimes ?
Enfer, n’as tu pas deu leur ouurir tes abysmes ?
 
 
Mais se peut il qu’en ces excés,
Des François soient de la partie ?
Non, non, ce ne sont plus François,
S’ils font la guerre à leur Patrie :