[retour à un affichage normal]

Mazarinade n° B_2_3

Image de la page

Anonyme [1649], TRES-HVMBLE REMONSTRANCE DV PARLEMENT AV ROY, ET A LA REYNE REGENTE. , françaisRéférence RIM : M0_3814. Cote locale : B_2_3.

craindre des courages mediocres. Mais comme il est malaise
de soumettre par cette passion vn si grand Corps, qui ne
craint que de manquer à son deuoir, ces exemples de violences
ne l’ont pas empesché qu’auec l’auis des Compagnies
Souueraines, voyant le Peuple oppressé par des impositions,
des leuées, des taxes, & autres telles vexations, qui se commettoient
par voye de faict ou par la seule authorité des Arrests
du Conseil, il n’ait pour satisfaire aux obligations de fa
charge pris connoissance des causes de ce desordre, & n’en
ayt aucunement arresté le cours. Et nous pouuons dire à V.
M. sans exagerer, que si vostre Parlement n’eust interposé
vostre Authorité pour empescher ces oppressions, le Peuple
eust esté bien tost ou dans l’impuissance ou dans le murmure :
Ce premier mal est la foiblesse des Estats, & le dernier est
la disposition aux reuoltes, que les sages Politiques doiuent
tousiours preuenir, sçachant bien que la patience des hommes
est limitée, & que Dieu ne met pas mesme la constance
des Iustes à toutes espreuues. Les seruices que nous auons
rendus à V. M. SIRE, en soulageant vos Subjets, & vous
remettant en possession de vos reuenus, ont empesché ces
accidens ; mais ils ont allumé la haine du Cardinal Mazarin
contre vostre Parlement, le voyant vn obstacle à sa tyrannie :
Et c’est le sujet qui l’a fait recourir à de nouueaux moyens
pour le perdre.
 
De là est venu le traitement outrageux, qu’il receut publiquement
à la face de vos Maiestez, de leur Cour, & de
toute la France, où cette Compagnie fut traitée de rebelle
& de factieuse par la bouche du Chancelier, en vn lieu cù
la moindre action de dureté blesse la dignité Royale, Delà
vint en suite la proscription de plusieurs Senateurs, & l’emprisonnememt
de deux des principaux, en vn iour dedié à la
joye publique, & à loüer Dieu du succez qu’il luy auoit pleu
donner à vos Armes ; Deformité estrange, pour ne pas dire
impieté sacrilegue, d’auoir meslé vn tel deüil dans vne si
saincte resiouissance. Conseil noir & cruel, mais d’ailleurs
plein d’aueuglement, qui excita aussi tost les imprecations
publiques contre le Cardinal Mazarin, l’ire de Dieu sur luy,