[retour à un affichage normal]

Mazarinade n° C_3_41

Image de la page

Henri (Prince de Galles) [signé] [1649], LETTRE DV PRINCE DE GALLE ENVOYÉE A LA REYNE D’ANGLETERRE. Auec les regrets du mesme Prince sur la mort du Roy de la grand Bretagne, son Seigneur & pere. Arriuee d’Amsterdam le 24. Feurier 1649. , françaisRéférence RIM : M0_2129. Cote locale : C_3_41.

Lettre du Prince de Galle enuoyée
à la Reyne d’Angleterre sa Mere.
MADAME,
Le delay que i’ay apporté contre mon
ordinaire a vous depescher ce Courier, aura
mis, ie m’assure, vostre Majesté en peine
de laquelle ie craindrois d’estre blasmé,
n’estoit la cognoissance que i’ay tant de
vostre bon naturel, que du iuste suiet de ce long retardement.
Ie sçay bien que vous auez esté desia amplement informée
de la fin honteuse de mon tres honoré Pere & Seigneur,
vostre tres-cher mary, condamné iniustement à la
mort par la malice & enuie de ses ennemis qui se sont rassasiez
de son sang dont ils estoient alterés depuis si long-tẽps ;
Toutefois mon deuoir m’a obligé de vous mander maintenant
ce que l’excez de ma douleur ne m’a pas plustost permis,
ie ne crains point d’estre estimé cruel en cela ny d’estre
repris de croistre & d’augmenter vostre tristesse ; Ie sçay
qu’elle est telle qu’il est impossible qu’elle puisse receuoir
aucun accroissement, & partant ie ne me puis empescher
de vous remettre au deuant des yeux vne mort qui fait horreur
mesme à ceux qui ny ont aucun interest. Cette pensee
quoy que mortelle à mon ame, semble estre maintenant
ma seule nourriture, & mon plus grand contentement c’est
de ne l’esloigner iamais de mon esprit. En effet quelle consolation
pourray-ie auoir au monde desormais, denué de
force & de moyens suffisans pour me vanger de la cruauté
de ces barbares meurtriers. Sa Maieste en laissant cette vie
miserable ma laissé heritier de ses Royaumes & de ses biens,
& moy ie voudrois auoir donné mille & mille Royaumes