[retour à un affichage normal]

Mazarinade n° A_4_6

Image de la page

La Mothe-Houdancourt (Henri de) [?] [1649], TROISIEME FACTVM, OV DEFENSES DE MESSIRE PHILIPPES DE LA MOTHE-HOVDANCOVRT DVC DE CARDONNE, & Mareschal de France, CY-DEVANT VICE-ROY ET CAPITAINE General en Catalogne. Auec plusieurs Requestes, Arrests, & autres Actes sur ce interuenus, tant au Conseil, qu’ailleurs. , français, latin, italienRéférence RIM : M0_2849. Cote locale : A_4_6.

Le Mardy 17. Decembre Messieurs du Parlement sur cela s’estans
assemblez, le sieur Procureur General demanda communication
de l’adueu de la Requeste, fait par Monsieur le
Mareschal : & bien que ce ne fust qu’vn pur pretexte de delay,
duquel il descouurit assez le motif, disans qu’il attendoit
des Patentes dans le Lundy d’apres pour empescher le
Parlement en corps d’en connoistre d’auantage, & pour
luy declarer les Iuges que Sa Maiesté vouloit qui trauaillassent
à cette affaire, ladite communication pourtant luy
fut accordée.
Le 19. le Seigneur Mareschal ayant representé à la Cour
les moyens de vexations qu’inuentoit le Sieur Procureur General
pour retarder la Iustice qu’il attendoit, & qu’il luy
pleust y mettre ordre, ladite Cour luy fit commandement par
Monsieur de Boffin d’Argenson Conseiller, de faire son deuoir,
& de cesser toutes ces remises.
Et le Vendredy 20. que finissoit le Parlement, Monsieur
le Mareschal de la Mothe ayant presenté Requeste audit
Parlement en corps, qui estoit saisi de son affaire, à ce
qu’il luy peust ordonner que les Parties viendroient plaider
sur les appellations au premier iour plaidoyable d’apres
les Roys ; Ledit Sieur Procureur General ne refusa pas seument
de conclurre, & de rendre ladite Requeste auec le
procez verbal : Mais pour empescher qu’il n’y interuinst aucune
deliberation, par vn artifice signalé & diuision inouye,
il fit en sorte que la troisiesme Chambre, ny les sieurs President
de la Coste, & de la Martelliere Commissaires n’assisterent
point à l’Assemblée des Chambres : choses remarquable
contre l’honneur du Parlement, qui s’assemble en Robe
rouge ce jour là ; & qui ressent sa caballe : & fit leuer les espaules
à tout le reste du Parlement : Lequel en fin considerant
que ledit Sieur Procureur General faisoit depuis deux
mois l’office de preuenu en fuyant la Iustice ; & Monsieur le
Mareschal de la Mothe, la fonction de Procureur General
en la poursuiuant comme il fait : ordonna, Chambres assemblées,
qu’il seroit forclos dans le iour s’il ne rendoit ladite