[retour à un affichage normal]

Mazarinade n° D_1_3

Image de la page

Morgues, Mathieu de [1643], LES DEVX FACES DE LA VIE ET DE LA MORT DE MARIE DE MEDICIS ROYNE DE FRANCE VEFVE DE HENRY IV. MERE DE LOVYS XIII. ROYS TRES-CHRESTIENS. DISCOVRS FVNEBRE. Par Messire MATTHIEV DE MOVRGVES Sr. de Sainct Germain, Docteur en Theologie, premier Aumosnier & Predicateur de ladite DAME ROYNE; Predicateur du ROY CATHOLIQVE, & Preuost de Harlebeke en Flandres. DEDIÉ A LA ROYNE CATHOLIQVE. , français, latinRéférence RIM : Mx. Cote locale : D_1_3.

nostre siecle, & que diuers rencontres nous presentent ;
mais encore à ceux, que l’inegalité & l’iniustice
du monde produiront iusques à sa fin. Cette charité,
que ie peux appeller vniuersele & eternele, paroit en
la fondation des Hospitaux dressés pour le soulagement
des malades. Nostre Royne en a fondé & doté
deux grands à Paris ; vn pour les hommes au Fauxbourg
de S. Germain, soubs la conduite des Religieux
du Bienheureux Iean de Dieu, dits vulgairement Freres
ignorans, & appellé l’Hospital de la Royne ; l’autre
dans cette grande ville pour les femmes, gouuerné
par des saintes Religieuses enfermées : entre lesquelles
(ainsi que ie l’ay apris de Sa Maiesté) vne, qui a des
grandes lumieres de Dieu, luy predit deuant son
emprisonnement toutes les afflictions qui luy arriuerent,
& luy en descouurit la cause. Ie ne dits rien de
ce que durant sa Regence elle employa son authorité
pour reduire à vne meilleure regle la conduite de tous
les Hospitaux & Maladeries de France ; & qu’elle
n’alloit iamais en aucune ville, qu’elle ne leur fit du
bien. I’adiouste à ces ouurages de charité Chrestienne
ses aumosnes ordinaires ; qui estoit (lors qu’elle
ioüissoit de son bien) de douze cens escus par mois,
outre les extraordinaires qui se faisoient aux Religieux,
& aux pauures que la honte empeschoit de
mendier publiquement. Sa charité paroissoit aussi
enuers les prisonniers, deliurant à Paris la Sepmaine