Mazarinade n° C_1_19
Image de la page
Anonyme [1649], LA CONFERENCE DV CARDINAL MAZARIN AVEC LE GAZETIER, Iouxte la coppie Imprimée à Bruxelles. , françaisRéférence RIM : M0_742. Cote locale : C_1_19.
s’est trouuée veritable pour toy, de mon costé i’espere d’y mettre
bon ordre. Premierement, en nourrissant le Roy dans vne auersion
cruelle contre les Parisiens, que ie luy representeray incessamment
comme des enragez contre sa Majesté, & le cousteau en la
main pour l’égorger. Secondement, en conseruant l’vnion que i’ay
auec le reste du Conseil, toute la parenté du Cardinal de richelieu,
les Financiers & les Partisans, la fortune desquels est si fortement
attachée à la mienne, que ie ne puis tomber, qu’ils ne se brisent.
Sçais-tu pas bien que le Chancelier ne subsiste que par moy ?
& que pour faire, qu’il suiuit mes volontez à l’aveugle i’ay fait, qu’à
mon occasion il a offensé toutes sortes de compagnies, & principalement
le Parlement, dont il estoit du Corps : il a foulé aux pieds
toutes sortes de Loix : méprisé les Ordonnances & les maximes de
l’Estat : ruïné les Priuileges & les prérogatiues du Royaume ; &
lors que l’on en a fait des plaintes publiques ou particulieres, afin
de ietter tout le fardeau sur luy, I’ay dit mesme en sa presence, &
sans qu’il ait osé repartir, que c’estoit à luy à qui il s’en falloit prendre,
non pas à moy, qui estant Estranger, & esleué dans vn autre
genre de vie, ne pouuois pas sçauoir les regles de la conduitte de
l’Estat. Si bien qu’il est vn objet d’aversion au peuple aussi horrible
que moy, quand mesme on ne sçauroit rien des inuẽtions du Sceau,
ny des taxes, des bouës, & tant d’autres petits artifices qui luy ont
acquis plus de quinze cens mille liures de rente, sans son hostel,
l’argent en monnoye auec les autres meubles. Pour la race Cardinale,
elle peut bien se recommander à Dieu si ie quitte, & la
Combalet prendre logement aux Carmelites, où elle feignoit de
se vouloir retirer lors qu’elle n’esperoit & n’aspiroit à rien moins,
que d’estre Reyne ou Madame. E : pour les Financiers & Partisans
il ne faut pas le dire. Tu sçais qu’ils sont le sujet de la guerre, à
cause des prests où nous les auons voulu conseruer, & de la Chambre
de Iustice que nous n’auons pas voulu establir, ou comme des
papillons ils auroient brûlé leurs aisles à la chandelle, & auroiẽt esté
consommés à petit feu. Que deuiendroit Tubeuf & ses Confreres
si ie n’estois plus ? Quelle capilotade ne feroit-t’on pas de Catelan
& de toute la maltote ? L’espée de Chemereau seroit-elle bien
assez forte pour mettre son beau-pere Tabouret, fils d’vn frippier
à couuert ? en quel lieu du Royaume se pourroit cacher le Tellier,
afin d’estre à l’abry de la fureur, ie ne veus pas dire de la Mothe
Hodancour ; mais des femmes de Sainct Eustache, que l’on a tasché
d’affamer par son conseil auec le reste de Paris ? Or comme il
Image de la page