[retour à un affichage normal]

Mazarinade n° B_14_7

Image de la page

M. B. I. V. D. R. D. L. P. P. T. [1652], PRESAGES DE CHANGEMENT EN LA MONARCHIE DES FRANÇOIS Par M. B. I. V. D. R. D. L. P. P. T. , français, latinRéférence RIM : M0_2859. Cote locale : B_14_7.

son fils naturel Henry, à son legitime Pierre. Robert
Duc de Normandie allant en terre Saincte, prefera son
fils Guillaume à ses enfans legitimes : Charles Martel
prefera son fils Pepin à tous ses freres aisnez, à cause
qu’il auoit les qualitez dignes de la Couronne de
France.
 
Certainement le Prince qui n’a que le sang & la
naissance sans les qualitez & vertus Royalles se glorifie
en vain, s’il ne les acquiert & s’il ne deuient vertueux.
Ie ne prend point simplement vertueux à la
mode, pour bon homme ou bigot ; mais qui soit
sçauant suffisamment pour satisfaire à sa vacation &
condition autant qu’il suffit pour contenter le Prince
es vrayes & solides science de Philosophie & Theologie,
non sophistiqueries ; mais aux poincts fondamentaux
de l’vne & de l’autre science pour tenir & conseruer
la vraye religion que le premier Roy Chrestien Clouis
a professé, celle là mesme que Charlemagne a cultiué,
& que S. Louys a si sainctement pratiqué. C’est par
là, & par l’exemple des bons Roys qu’ils apprendront
à bien gouuerner, & à bien commander, & en suite à
leurs peuples, à bien & fidellement obeyr en toute prosperité,
suiuant le bon Genie de la France, qui la maintient
par la prouidence, que le Tout-puissant fait reluire
au benin Iupiter pour elle, lequel ayant son throsne
Royal au Sagittaire, sous lequel est la France, rend
sa fortune heureuse. Que si elle a souffert, & souffre des
calamitez, & que sa gloire ne se soit estenduë par tout,
ce n’a esté que par la mauuaise geniture des Princes,
ou par ceux qui les ont mal conseillé, Que s’il arriue
que le Roy sympathise auec l’Estat de la France, la gloire
de l’vn & de l’autre, n’aura aucunes limites. Alors le
Roy sera remply de Majesté, d’excellence & de magnanimité
du Soleil ; Il sera comblé de probité, de religion,
de iustice, & de toute sorte de prosperité par Iupiter. Il
sera humain, doux, ciuil, & honneste de la belle & bonne
Venus.