[retour à un affichage normal]

Mazarinade n° B_5_24

Image de la page

Anonyme [1649], LA RESSEMBLANCE DE MADAME LA DVCHESSE D’ORLEANS A LA COLOMBE QVI APPORTA LE RAMEAV d’Oliue à Noé. Presenté à son Altesse Royale. , françaisRéférence RIM : M0_3516. Cote locale : B_5_24.

en actions puisque vous ne faites que des actions de Princesse &
vrayement Princesse, vous estes modestes en pensées puisque vous
n’aués point ces vains sentimens d’honneur & de gloire, & que
vous n’en aués que pour le bien de tout le monde. Mais vous excedés
en zele & en pieté puisque vous n’aués d’autre but que l’amour
de Dieu dont ie parleray ailleurs, & le bien & l’accroissement
de vostre Patrie. Mais si i’en dis dauantage sur ce point vostre mesme
modestie sera offencée ie passe à vostre blancheur.
 
Il n’y a personne qui ne sçache que vous estes vn chef-d’œuure
parfait, & que vostre beauté incomparable fait honte aux rayons
du Soleil a la blancheur des lys, a la couleur vermeille des roses,
vos yeux a lazur du Ciel, & vostre bouche au corail, & pour preuue
de cette verité ie ne veus que les sentimens du plus grand Prince
de la terre dont vous estes la chere espouse. Mais si vostre beau visage
à tant de charmes, il n’y à personne qui nesçache que vostre
ame est toute blanche & que vous l’auez si bien purifice qu’elle s’est
detachee de tous les sentimens du monde pour suiure aueuglement
les volontez de Dieu, en admirer les secrets iugemens, & reciproquer
aux amoureux sentimens de vostre cher espoux, & i’ose sans
prophaner vous dire que vous estes toute belle & sans tasche comme
l’espoux diuin dit à son espouse.
Mais ce qui fait mieux éclater vostre blancheur c’est cette douceur
mesme qui vous accompagne dans toutes vos actions, & ie
ne sçay si vous auez le plus de gloire à estre belle qu’à estre douce,
comme ces deux qualitez se quittent rarement puisque l’vne charme
les yeux & l’autre le cœur. Ceux qui ont le bien de vous approcher
disent qu’il n’y à pas grande difference entre vostre modestre
& vostre douceur, puisque si vous estes modeste en tout, vous
estes douce en tout, soit en paroles, soit en actions, soit en pensee.
Vous estes douce en paroles puisque vous n’auez iamais proferé
aucun mot plain d’aigreur, & qui ait pû fascher la moindre personne
du monde, vous estes douce en actions puisque vous n’auez iamais
fait aucune action en colere. Enfin vous estes douce en pensées,
puisque vous n’auez eu iamais aucun sentiment de vengeance
& de haine, & que vous n’auez iamais respiré que la charité, la
douceur & la clemence.