Mazarinade n° A_7_58
Image de la page
Anonyme [1649], LA TRANQVILITÉ PVBLIQVE RESTABLIE A PARIS, PAR L’HEVREVX RETOVR de la Paix. ENVOYÉE DV CIEL A LA FRANCE. CONTRE LES FAVX BRVITS SEMEZ AV preiudice de l’honneur de sa Maiesté, & de la tranquilité publique. DISCOVRS MORAL ET POLITIQVE, Dedié au Roy. , françaisRéférence RIM : M0_3801. Cote locale : A_7_58.
ne trouue rien de plus grand, que le bien que nous
auons reçeu, soit qu’on en examine la chose, ou la
personne qui se donne, ou celuy qui le reçoit, ou
le temps, ou les circonstances. Pour la chose, qui
a t’il sur la terre, qui puisse égaler son prix, parce
que toutes les choses du monde sans la paix, ne sont
rien qu’vne charge inutile, & vn embaras tout
plein de difficultez ? Qui a t’il au monde de plus rare,
puis que la rareté mesme qui s’y trouue, n’est
sans la paix qu’vne ruyne, ny qu’vn tourment ? Il
n’y à rien de plus beau dans les Cieux, que la Paix ;
puisque nous n’y aspirons que par elle, & que la
souueraine esperance de l’homme, est toute en ce
contentement d’esprit, qui luy promet le repos de
son ame, en la presence de son Dieu. A dire vray,
SIRE, de la Paix depend tout le bien de l’homme,
puis que sans elle, il ne peut rien posseder, qu’il
puisse nommer bien. Les qualitez de l’ame les plus
accomplies, luy doiuent donner le premier degré
d’honneur, & l’eleuer par excellence, au dessus de
toutes les autres ; puis que sans la paix leurs fonctions
sont empeschées, ou par les apprehensions,
ou par les diuertissemens. Les qualitez du corps
viennent apres, qui sont la santé, la disposition, &
la bonne grace ; mais sans la paix, ce ne sont que
des cheuaux de bagage, qui ne seruent qu’à porter
le faix d’vne guerre, à la mercy des inconueniens,
des malheurs, & des perils. Les autres biens qui
sont hors de nous, & qui ne nous touchent que par
accident, comme les femmes, les enfans, & les autres
Image de la page