[retour à un affichage normal]

Mazarinade n° B_17_27

Image de la page

Anonyme [1652], LA VERITÉ, PARLANTE AVEC liberté, sur l’Estat present. I. Sur la corruption de tous les Ordres & Loix du Royaume, dans le Ministere du Cardinal Mazarin. II. Sur les mal-heurs que la France à soufferts par sa tyrannie. III. Sur les moyens de preuenir à l’aduenir le Gouuernement des Estrangers. IV. Et pour pourueoir à la Regence durant la Minorité & le bas-aage de nos Rois. , françaisRéférence RIM : M0_3997. Cote locale : B_17_27.

& de Clotaire le Grand, la fille Blitilde, &
de Charles le Grand Empereur & Roy, ces deux
filles n’eurent point de part : Louis le Begue Empereur
& Roy, laissant à sa mort son fils Posthume,
Charles le Simple, Eude Comte d’Anjou,
son Regent, s’empara du tiltre de Roy. Mais
Dieu le frappa de sa main, & au lict de la mort
luy fit recognoistre par testament, que contre
la Loy du Royaume, il auoit vsurpé la Couronne :
son frere Robert ayant voulu contre cette
Loy, se faire Couronner Roy trois iours apres,
Dieu le fit perir en vne Bataille, & par sa mort
& de Raoul qui voulut le suiure, ne leur laissant
aucune posterité, fit cognoistre à l’Vniuers qu’il
est Autheur & Protecteur de cette Loy.
 
Mourant Charles le Bel, sa femme estant enceinte,
sur l’incertitude qu’elle eust vn masle,
Philippes de Valois fut Regent : elle n’eust qu’vne
fille incapable de la Couronne, ces trois debatterent
le Royaume : Ieanne fille de Louis
Huttin, Edoüard troisiesme Roy d’Angleterre,
fils d’Isabeau, propre sœur de Louis Huttin, &
Philippes de Vallois, Cousin Germain du mesme
Louis Huttin : Ieanne soustenoit que les
masles faillis, elle pouuoit succeder à la Couronne
de France, tout ainsi qu’à son pere elle
auoit succedé pour la Nauarre : que les filles
estoient excluses, non pour haine de leur sexe,